Talaytaytan

I përmbahej ende mendimeve të mëparshme, se kishte plot njerëz që duhej t’u shtypej koka. Vajzat vazhdonin të ekzistonin si qenie të pafytyra dhe të neveritshme. Vetja gjithmonë i ishte dukur i mahnitshëm, vazhdonte të ishte i tillë. Ajo çfarë kishte ndryshuar në qenien e tij ishte fakti, që kish ardhur koha të krijonte një raport të mirëfilltë mes shtypjes së insekteve dhe mënyrës së sjelljes ndaj vajzave të përbindshme, gjë e cila do të realizohej me një fisnikëri që buronte nga një e kaluar e hershme dhe një përgjegjësi e re që ia kishte vënë edhe trashëgimia. Ai po evoluonte ngadalë në përshpirtshmërinë e një biznesmeni të pashpirt, pra jo si një vagabond rruge! P.sh. do vinte një ditë dhe si dënim vajzat nuk do t’i dëmtonte fizikisht, por, pasi t’i përdorte, do t’i flakte tutje. Nga ana tjetër, nënshtrimin e insekteve dhe personave shpirtzinj nuk do ta bënte me dhunë, por me para.