Poeti i vështirë Lasgush Poradeci

Me Lasgush Poradecin ndodh, në fakt, një modifikim strukturor në retorikën e poezisë shqipe. Nëse deri tek Poradeci ligjërimi kishte një patos të jashtëm dhe mesazhi poetik konfigurohej në bazë të një sasie të madhe informacioni, transmetuar lexuesit, përmes autorit të vëllimit “Vallja e yjeve”, lirika interiorizohet duke u bërë, në radhë të parë, shprehja e një gjendjeje vetëdijeje, e cila bëhet konkrete përmes një gjuhe me ngjyrim afektiv. Lasgush Poradeci e bëri poezinë më të thukët, më thelbësore, duke i falur asaj autonomi, shkëlqim dhe absolutizëm.