Triptiku i magjistarëve

Rrëfimet e këtij triptiku nuk vijnë njëri pas tjetrit në mënyrë drejtvizore. Struktura e tij i ngjan asaj të ndërthurjes së serialeve televizive të ndryshme.
Për shembull, të hënën jepet episodi i parë i një seriali, të martën jepet episodi i parë i një seriali tjetër, të mërkurën, i një tjetri, e kështu me radhë, të enjten, të premten, të shtunën, të dielën; pastaj, të hënën e javës së dytë jepet episodi i dytë i serialit të parë, të martën jepet episodi i dytë e serialit të dytë… e kështu me radhë gjer në mbarim të javës, dhe në të njëjtën mënyrë gjatë javës që pason…
Ose me ndryshim radhe, sikurse në këtë libër, i cili, si çdo triptik, përbëhet nga tri rrëfime, por që ndërpriten nga njëri-tjetri më se një herë.