Naim Frashëri dhe letërsia perse

Naim Frashëri, poeti kombëtar i shqiptarëve, konsiderohet si një nga figurat më me ndikim në formimin e identitetit dhe të vetëdijes shqiptare. Në monografinë më të re “Naim Frashëri dhe letërsia perse” të orientalistit A. Rexhepi krijimtaria letrare e Naimit vështrohet nga prizmi i letërsisë e kulturës perse, duke nxjerrë në pah shenjat dhe gjurmët e letërsisë perse në veprën e tij. Duke i evidentuar ndikimet perse, në fakt, ky studim shtjellon ndërkomunikimin kulturor të letërsisë e kulturës shqiptare edhe me një kulturë tjetër e letërsi të madhe botërore, siç është ajo perse, ndërkohë që njihet ndikimi i romantizmit evropian te Naimi vetë por edhe në krejt kulturën dhe letërsinë shqiptare. Sipas studiuesit nga Kosova, A. Hamiti, libri “Naim Frashëri dhe letërsia perse” provon se deri më tani “nuk i kemi njohur sa duhet të gjitha dimensionet letrare e kulturore të veprës së poetit tonë kombëtar. Pa asnjë hamendje mund të pohohet se libri i Abdulla Rexhepit ka plotësuar një zbrazëti të madhe në studimet naimiane dhe të albanologjisë”.